BAGUIO CITY – Boluntaryo a simmuko kadagiti otoridad sadiay Angao, Ammacian, Pinukpuk, Kalinga ti maysa a kameng ti rebelde a New People’s Army nga addaan operasyon kadagiti munisipyo ti Pinukpuk, Balbalan, Lubuagan, Tinglayan ken Tanudan iti probinsia ti Kalinga.
Nabigbig daytoy a ni alyas Lando wenno Pilot, 54-anyos, naasawaan ken miembro ti Squad Dos, Section Committee 2 ti Marcial Daggay Command ti Komiteng Larangang Guerilla Baggas, Ilocos-Cordillera Regional Committee ti NPA iti sidong ti liderato ni Kennedy Bangibang alyas Akbar.
Insuko metlaeng ni alyas Lando ti maysa nga M16 rifle, maysa a bandolier wenno barikes a pagkabilan ti bala, dua a uppat a magazines, 97 a bala, tallo nga improvised explosive device, uppat a pidaso ti Sodium Chloride, 10 a pidaso ti Surgitech, 38 a tableta ti dua a klase ti agas a pang-ut-ot, 10 a metro a detonating cord, maysa a bandera ti NPA ken maysa a libro ti Comprehensive Agreement on Respect for Human Rights and International Humanitarian Law.
Sigun kenni PCol. Davy Vicente Limmong, dadaulo ti Kalinga Police Provincial Office, ti panagsuko ni alyas Lando ket resulta ti agtultuloy nga operasyon ti pulisya ken militar iti sidong ti proyekto nga End Local Communist Armed Conflict iti pagilian.
Kinunana a paset metlaeng daytoy ti nairtengan a focused operation dagiti otoridad kontra iti rebelde a grupo nga addaan operasyon sadiay Kalinga.
Innayonna nga addaan ita iti kustodiya dagiti otoridad ti Kalinga ni alyas Lando ken dagiti insuko daytoy a kagawaan.
Mangnamnama pay ti Kalinga Police a babaen iti agtultuloy a panagbibinnadang dagiti tropa ti gobyerno ken dagiti lokal a gobyerno ket ad-adu pay a rebelde ken mangsupsuportar kadagiti NPA ti agsubli iti sidong ti linteg para iti nakapkappia a panagbiag.
