BAGUIO CITY – Boluntaryo a simmuko iti Police Regional Office Cordillera (PROCOR) ti maysa a lider dagiti rebelde ken ti inana a militia ng bayan.
Immuna nga imparang ti PROCOR alyas Balyer, 25-anyos, residente ti Baguio City ken squad leader dagiti rebelde nga addaan operasyon iti Benguet-Abra-Mountain Province-Ilocos Sur ken karaman iti PSRTG Watchlist para iti umuna a kwarter ti agdama a tawen.
Insukona metlaeng ti maysa a KG9 submachine gun nga addaan ti siyam a bala ken maysa nga MK2 hand grenade.
Maibasar iti rekord ti PROCOR, idi 2013 ket nakipaset daytoy iti cultural presentations dagiti cultural organizations ditoy Baguio City gapu iti abilidadna nga agay-ayam iti gangsa.
Naduktalanna laengen a maysa kadagiti patrons dagitoy ket legal fronts ti komunista a grupo agingga a naimpluwensia-an daytoy ken nagbalin nga aktibo a miembro ti PINATUD-ANAKBAYAN ken Kabataan para sa Tribung Pilipino (KATRIBU) iti sidong ni Beverly Longid ti Cordillera People’s Alliance agingga a nagbalin nga aktibo a makipaspaset kadagiti tignay protesta.
Nakipaset ni alyas Balyer idi tawen 2014 ken dadduma a militante a grupo iti Batayang Kursong Partido dagiti komunista a naawagan nga ‘INNADAL’ sadiay Barangay Irisan.
Nupay kasta, ditoy metten a nagundawayan dagitoy a naaramat kadagiti tignay protesta kontra iti gobyerno agingga a nakikappeng iti underground movement.
Naamuan nga iti kapada a tawen ket napagsapata daytoy kas candidate party member ti komunista a grupo agingga a nagbalin a full-party member ken squad leader.
Al-allukuyenna met dagiti sigud a kakadwana a rebelde iti panagsuko dagitoy tapnu maaddaanda iti nataltalna a panagbiag ken narimrimat a masakbayan.
Kabayatanna, insuko metlaeng ni alyas Nanay nga ina ni alyas Balyer ti maysa a colt 45 a naglaon ti pito a bala ken maysa nga MK2 hand grenade.
Maibasar iti rekord ti PROCOR, ni alyas Nanay ket aktibo a Milisya ng Bayan wenno mangsupsuportar kadagiti rebelde nga NPA sadiay Tubo, Abra.
Iti presentasyon sadiay PROCOR, imbingayna a sinupsuportaranna dagiti rebelde, nangruna dagiti agtutubo a rebelde gapu iti anakna a nakikappeng iti nasao a grupo ken imbilangna nga anak dagiti nasao a kakadwa ti anakna.
Nupay kasta, pagyamyamananna ti desisyon ti anakna a sumuko iti gobyerno tapnu agdennada iti nataltalna a panagbiag.
Al-allukuyenna met dagiti nabatbati a rebelde, nangruna dagiti agtutubo iti panagsuko dagitoy tapnu maaddaanda iti narimrimat a masakbayan iti sidong ti gobyerno gaputa awan ti pagbanaganda iti rebelde a grupo.
Innayonna a kas ina ket mabuteng a mapasamak kadagiti rebelde nga agtutubo ti napasamak iti baro a rekrut ti rebelde a pinaltogan metlaeng dagiti kakadwana sadiay Lacub, Abra.
Pagyamyamananna met ti kailya a nakiballaet a nangipalawag kenkuana iti kinapudno a napimpintas ken nataltalna ti biag no saan nga aglemlemmeng iti bantay.
