Puntiria ni Baguio City crochet artist Adelaida Guia a maala ti rekord a “Largest Crochet Mandala.”
Impakaamona nga inawat ti Guinness World Records ti aplikasyonna para iti nasao a titulo.
Tallo a dekada nga agar-aramiden ni Guia ti giant mandala nga iparparangna iti Session Road ken nagduduma a parke iti siudad ti Baguio.
Nangisubmitir isuna ti application idi laeng Hunyo.
Iti uneg ti innem a pulo ket pito nga aldaw, nakompletona ti six-meter diameter mandala nga agdagsen ti 32 kilograms usar ti 5 mm hook.
Rinugianna idi July 2024 ti panagaramid ngem naisardeng idi August 2024 gapu iti heart attack.
Intuloyna ti panagaramid idi laeng May 2025 iti Rose Garden agingga a nalpasna idi June 2025.
Naawatnan ti confirmation manipod iti Guinness World Records tapno makompletona amin dagiti kasapulan ken pagannurotan tapno kamaudiananna, magun-odna ti titulo.
