Agtultuloy ti panakikoordinar iti Regional Disaster Risk Reduction and Management Council-Cordillera kadagiti Local Government Units iti rehion tapno mabantayan dagiti lugar a narisgu iti panagreggaay iti daga wenno landslide.
Maysa kadagiti binilin iti nasao nga opisina a mangisubmitir iti action plan ket ti Itogon, Benguet tapno makaaramid dagitoy iti contingency ken operational plan nangruna ita a mapaspasaran ti panagtudo.
Sigun kenni Frankie Cortez, Chief iti Operations Division iti Office of the Civil Defense-Cordillera, kasapulan a masigurado a nakasagana dagiti lokal a gobyerno tapno masigurado nga umno ti panakaipatungpal ti preemptive evacuation.
Malaksid iti dayta, napateg metlaeng a kabisado dagitoy ti luglugar wenno disso iti masakupanda a narisgu iti iti panagreggaay iti daga wenno landslide.
Kabayatanna, mapalpalagipan ti publiko nga agridam ken agtalinaed nga aware kadagiti kaudian a damdamag seknan iti sasaaden iti panawen.//Bombo Noveh Organo
