BAGUIO CITY – Mailukat manen inton July 2 agingga September 29 iti agdama a tawen ti panagparehistro dagiti kwalipikado a botante para iti masungad a May 2019 national and local elections.
Iti panakiyuman ti Bombo Radyo, kinuna ni Atty. John Paul Martin, City Election Officer a malaksid iti panagparehistro dagiti baro nga agbotos ket maakomodar pay dagiti agakar iti pagbotosan, dagiti agpabaro iti detalye iti voter’s information, dagiti agpa-ala iti biometrics ken dagiti agpa-reactivate.
Sigun kenkuana, tallo laeng a bulan ti naipaay kadakuada gaputa adda pay dagiti ar-aramidenda a post-Barangay and SK election activities ken adda manen dagiti panagsagana nga aramidenda iti masungad nga eleksion.
Gapu iti daytoy, kidkiddawenna ti nasapa a panagturong dagiti maseknan iti opisinada tapnu saan a mairikepan dagitoy no iti maudi nga aldaw nga agturongda iti COMELEC.
Innayonna nga ita nga aldaw ket nangrugin ti panangimprentada kadagiti forms a maaramat iti nasao a panagparehistro.
Sigun pay kenkuana, awan ti rason tapnu adda dagiti saan nga agparehistro gaputa silulukat dagitoy iti Sabado ken holidays bayat a mangitugot laeng dagiti kliyente iti ID wenno aniaman a proof of identity.
Offsite registration
Inwaragawag ni Atty. Martin a mabalin a mangipatungpalda iti offsite registration para iti nasao nga eleksion la ketdi kiddawen dagiti barangay officials nga iti barangayda a maangay ti panagparehistro.
Nupay kasta, kinunana a nasken a siguraduen dagiti barangay officials a nga adu wenno nasurok iti 200 dagiti akomodaren ti opisinada tapnu saan a sayang ti panawen ken effort dagitoy.
Innayonna a babaen iti panangidanun ti COMELEC iti serbisyo kadagiti barangay ket saanen a marigatan dagiti umili ken saandan nga agplete pay nga apan laeng iti opisina dagitoy sadiay Governor Pack Road.
Sigun pay kenkuana, mabalin a mismo a dagiti umili ti mangibaga kadagiti barangay officials tapnu kiddawenda met iti opisina ti komisyon ti nasao nga offsite registration.
