BAGUIO CITY – Maituloyen ti rehabilitasyon ti Loakan Airport kasaruno ti panakitaripnong ni Baguio City Mayor Mauricio Domogan iti Civil Aviation Authority of the Philippines (CAAP) para iti nasao nga eropuerto.
Kinuna ti mayor nga iti dayalogo dagitoy ket napagnumuan a maituloy ti rehabilitasyon ti Loakan Airport.
Kinuana nga iti maipatungpal a rehabilitasyon ket mairikep ti runway para iti pannakaisimpa dagiti nadadael a paset daytoy.
Immunan nga inaprobaran ti Cordillera Regional Development Council ti resolusyon a mangkidkiddaw panangipatungpal ti CAAP iti panagadal para iti modernisasyon ti Loakan Airport.
Maipalagip a manipud 1941 ket nag-operate ti Loakan Airport para kadagiti commercial flights ngem idi 2011 ket naipasardeng ti operasyon daytoy gapu iti nababa a passenger demand ken ti nangato a plete malaksid pay iti mapapati a saan nga umdas a suporta para iti maintenance daytoy.
