BAGUIO CITY -Kidkiddawen ti Social Security System (SSS) – North Luzon 1 Division ti panakaawat ti publiko seknan iti parikot ti attidog a pila dagiti transaksion iti nasao nga opisina.
Immuna iti daytoy, maidandanon iti Bombo Radyo Baguio dagiti pakaseknan ken reklamo ti publiko iti SSS maipapan iti nabuntog a transaksion, attidog a pila, kurang a a panangasikaso dagiti empleyado kadagiti kliyente ken dadduma pay.
Nainget met nga inkalintegan ni Regional Communications Officer Christian Andrew Rillorta iti panakiyuman ti Bombo Radyo nga agpada ti bilang dagiti ak-akomodarenda a transaksion tunggal aldaw iti awan pay ti pandemya ken iti agdama a krisis ti salun-at.
Kinunana a ti laeng nagdumaanna ket saan a mabalin nga ado ti sumrek a kliyente iti uneg ti branch ita a pandemya isu’y gapuna a maurnong ti pila iti ruar.
Imbinglayna pay a dumanon iti 300,000 a miyembro iti nasao a branch ti SSS ti sangsangwenda, pakairamanan ti 32,000 nga empleyado malaksid pay kadagiti miyembro iti kabangibang nga ili kas iti Tuba, Itogon ken dadduma pay.
Inlawlawagna met a saan a naan-anay ti pwersa ti personel dagitoy ta ado kadagiti empeyado ti naka-work at home.
Iti baet daytoy, kinuna ni Rillorta nga ikagkagumaanda nga agbalin a komortable ti panagpila ti publiko isu’t gapuna nga inyurnosda ti pagpilaan dagitoy nga adda tugawan ken paglinonganna.
Innayonna nga isapsapsapa da pay iti alas-siete ti agsapa nga umawat iti transaksion ken ag-ovetime iti malem tapno maakomodar amin a nagpila iti nasao a branch.
