Maipalpalagip iti publiko a kadagiti telecommunication companies ti masapol a pangireportanda kadagiti reklamo dagitoy kontra kadagiti scammers.
Iti panakiuman ti Bombo Radyo kenni Atty. Lilibeth Cosi, legal counsel ti National Telecommunications Commission – Cordillera, maibasar iti SIM Registration Act, dagiti telecommunication companies ti responsable iti panakabiruk dagiti scammers gapu ta dagitoy ti makaammo iti impormasyon ti sim card a naaramat iti scam, ken dagitoy metlaeng ti makabael a mangiblock kadagiti sim card.
Impetteng ni Atty. Cosi a ti panakaimplimintar laeng ti SIM Registration Law ti responsibilidad iti National Telecommunications Commission ngem mabalin dagitoy a mangipaay ti tulong kadagiti biktima nga agreport iti opisina dagitoy.
Mabalin metlaeng nga agkamang dagitoy iti pulisya partikular kadagiti cybercrime units.
Mainaig iti dayta, mapalpalagipan ti publiko a nu iparehistroda ti sim card, siguradwen da ti umno nga impormasyon nga ipaayda.
Kabayatanna, maiyunay-unay nga ilaksid dagiti maawat a suspicious messages gapu ta mabalin a dagitoy ket maysa a kita ti scam.//Bombo Rob Dominguez
