BAGUIO CITY – Maim-imbestigaran itan ti reklamo a naiyuman iti Bombo Radyo-Baguio seknan iti panagtaraken ti maysa a residente kadagiti baboy a mangituntunda iti naangot nga angin sadiay Beckel, La Trinidad, Benguet.
Iti panakiyuman ti Bombo Radyo kenni Kapitan Gregorio Antonio ti Beckel, La Trinidad, Benguet, kinunana a madama ti panagsukimat ti health department ti munisipyo iti piggery ti nasao a residente.
Naamuan nga dumanon iti 20 a baboy ti taraken ti nasao a residente ken immunan a naireklamo daytoy iti barangay gapu iti pannakaiwara dagiti tarakena a baboy iti kalsada a mangsingsinga kadagiti motorista ken iti panakiwara ti rugit dagiti baboy a mangipapaay iti angot iti nasao a lugar.
Naamuan pay a pagbutbutngan dagiti residente ti agtartaraken kadagiti baboy isut gapuna a naiyuman daytoy kadagiti otoridad.
Kinuna pay ni Kapitan Antonio a kabinnadangda ti Department of Public Work and Highways iti pannakarisut ti parikut iti maatap a pananggabur ti agtartaraken kadagiti baboy iti maysa a creek iti nasao a lugar.
