BAGUIO CITY – Agserbi a main event iti ONE: Global Superheroes ti rematch da Igorot mix martial artist Geje ‘Gravity’ Eustaquio ken Kairat Akhmetov para iti interim ONE Flyweight World Championship inton Enero 26 sadiay Mall of Asia Arena.
Sigun iti ONE Championship, daytoy ti umuna kadagiti uppat a blockbuster events dagitoy ditoy Pilipinas ita a tawen.
Maipalagip nga idi Setyembre ti napalabas a tawen ket inabak ni Akhmetov ni Eustaquio babaen iti split decision.
Ni Eustaquio manipud iti Team Lakay ket top flyweight contender bayat a ni Akhmetov ket sigud a ONE Flyweight World Champion manipud Kazakhstan.
Naituding met a makabalubal ni Igorot fighter Joshua Pacio ni Pongsiri Mitsatit manipud Thailand iti strawweight division.
Sangwen met ni featherweight standout Eric Kelly ti martial artist a ni Rafael Nunes manipud Brazil bayat a makabalubal ni featherweight prospect Edward Kelly ni undefeated martial artist Meas Meul ti Cambodia.
