Agtultuloy ti rescue operations, clean-up drives , ken dadduma a recovery works idiay Japan kasaruno iti panagdayeg iti 7.1 magnitude idiay Kumamoto Prefecture, Japan.
Iti pannakiuman ti Bombo Radyo Baguio kenni Marinel Rodrigo, Bombo International News Correspondent idiay Japan , ken agdama a mangmangged idiay Kurume, Japan, imbinglayna a kinumpirmar dagiti otoridad sadiay a dumanonen iti 13 dagiti bilang dagiti pimmusay bayat a dumanon met ti 31 dagiti nadangran no sadino mannarimaan metten ti panagpataming dagitoy.
Imbinglayna a napasaranda ti nasao a gingined iti pasado alas kwatro ti malem iti orasda idiay Japan (3:27 PM in Philippine Standard Time) idi kalman no sadino nakaawatda iti warning kadagiti cellphones da sakbay a napasamak ti panagdayeg. Innayonna a nakariknada metlaeng kadagiti aftershocks kalpasan iti nasao a gingined.
Kabayatanna, imblinglay metlaeng ni Rodrigo nga agtultuloy ita dagiti rescue operations babaen kadagiti otoridad.
Kalpasan gamin iti nasao a gingined, maysa kadagiti malls idiay Fukuoka Prefecture ti nakapasamakan ti maysa a panagbettak wenno explosion.
Nupay nakaruaren dagiti agarup 200 a kostumer ken empleyado ti nasao a mall, patien dagiti otoridad nga adda pay dagiti nabati iti uneg a kasapulan a maarayat.
Iti baet dayta, imbinglay ni Rodrigo a natalged dagitoy iti agdama nga ayanda idiay Kurume ken iti agdama, awan pay laeng ti naipadpadamag nga Overseas Filipino Workers (OFW) a naapektaran iti nasao a didigra. //bombokaren.c.sapirao