Imbutaktak ti Commission on Audit (COA) nga awan ti insubmitir ti Office of the Vice President a resibo ken dokumento a mangpaneknek iti nakaigastosan ti confidential funds.
Sigun kenni sigud a COA Intelligence ken Confidential Funds Audit Office State Auditor Roderick Wamil, insubmitir ti OVP ti acknowledgment receipts imbes nga official receipts wenno sales invoices a kasapulan para kadagiti panaggatang.
Impaganetget ni Wamil nga awan ti opisial a resibo ken sales invoice ti nakaigastosan ti ₱125 million.
Malaksid iti dayta, saan a nailanad iti original accomplishment report ti OVP no kasano a nagastos ti nasao a gatad.
Kabayatanna, nangpataud iti adu a saludsod dagiti dokumento nga imparang ti COA kabayatan ti impeachment trial ni VP Sara Duterte idi Agosto 03, 2026.
Maibasar iti nasao a dokumento, naipaay laeng ti acknowledgment receipts ken awan ti corresponding official receipts wenno sales invoices ti pannakagatang ti agas, lamisaan, tugaw, computers, printers, ken dadduma pay a suplay a maatap a ginatang ti OVP.
Malaksid iti dayta, ti ₱25.66 million ken addaan iti acknowledgement receipts a napetsaan iti Disiembre 2023, maysa a tawen kalpasan a na-liquidate ti kuarta idi 2022.
Sigun pay iti COA, awan ti petsa dagiti resibo a mangsuporta iti pannakagastos ti ₱3.27 million.
Saan metlaeng nga agtunos dagiti naisubmitir nga acknowledgment receipts nga agdagup iti ₱125.15 million, nasursurok ngem ti naideklara a ₱125-million a gastos iti ₱150,000.
Dadduma kadagiti gastos ket maatap a nairaman iti ₱40 million para iti medical ken food assistance bayat a ti ₱10 million ket maatap a naaramat para kadagiti incentives, rewards, ken travel.
Sigun iti testimonia, dagitoy ket saan nga umdas a mangpaneknek a nagastos iti nasayaat ti confidential funds.
Inlawlawag ni COA Intelligence ken Confidential Funds Audit Office State Auditor Wamil a ti panaggatang babaen iti pagaramat iti pondo ti publiko ket masapul latta a suportaran dagiti umno a commercial documents.
