BAGUIO CITY – Maipadasen ti saan a pannakairaman dagiti residente a senior citizen iti implementasyon ti number coding scheme iti Baguio City mangrugi inton Agosto 19.
Daytoy ket para laeng kadagiti residente a senior citizen nga agturong iti clinic, ospital ken trabaho.
Kasaruno pailaeng daytoy ti Executive Order No. 82-2024 nga impaulog ni Mayor Benjamin Magalong tapno maduktalan ti agbalin nga epekto daytoy iti gunay ti trapiko.
Maipalagip a naaprubaran iti city council ti singasing a pannakailaksid dagiti residente a senior citizen iti number coding scheme ngem in-veto paylaeng ni Mayor Magalong gapu ta kayatna pay nga adda ti maipatungpal nga experiment.
Ti experimental exemption ket maipatungpal iti dua a phase.
Umuna, dagiti lugan nga imanmaneho laeng dagiti senior citizen nga agturong iti clinic, ospital wenno trabaho ket mailaksid iti number coding scheme mangrugi inton Agosto 19 agingga Oktobre 18.
Maikadua, dagiti lugan nga uray saan a senior citizen ti driver la ketdi senior citizen ti kargana a mapan iti ospital, clinic wenno trabaho ket mailaksid iti number coding scheme mangrugi inton Oktobre 22 agingga Nobyembre 22.
Tapno mairaman iti daytoy, masapul nga agtawen iti innem a pulo nga agpangato, addaan iti I.D wenno dokumento a mampaneknek a residente iti siudad ken masapul a makumpirmar nu agturong dagitoy iti medical facilities wenno iti trabaho.
