Mangipila iti agsasaruno a kaso ti Baguio City kontra kadagiti residente ken negosio a maaktuan a mangibelbelleng iti basura ken wastewater kadagiti pagayusan iti danum.
Sigun kenni Baguio City Mayor Benjamin Magalong, mapainget ti tignay kontra iti polusion kadagiti karayan, ken kanal.
Nasurok innem a pulo a kaso ti naipilan, karaman ti iligal a panangibelleng iti narugit a danum, tumtumpaw a karga iti septic tank, ken saan nga umno a disposal iti rugit ken daga.
Iti agdama, dumanon iti 346 notice of violation ti naipaay.
Adda metlaeng iti P5,000 nga administratibo ken tallo nga aldaw tapno isimpa ti panaglabsing dagitoy gaputa nu saan ket sumango iti kaso a ligal.
Agtultuloy metten ti panagsukimat nangruna kadagiti estruktura nga asideg iti Balili River ken Bued River.
Sigun iti Department of Environment and Natural Resources, iti sidong iti Clean Water Act of 2004, mabalin nga agmulta iti P10,000 agingga P200,000 tunggal aldaw dagiti aglabsing, ken nadagsen pay ti posible a kaso–karaman ti pannakaibalud ken panangiserra iti negosio.
