BAGUIO CITY – Nangipasa ti resolusyon ti Sangguniang Bayan ti Bontoc, Mountain Province a mangiyap-apela iti napartak a panangimbestigar ken pananglawlawag ti Philippine Drug Enforcement Agency (PDEA), National Bureau of Investigation, Commission on Human Rights, Philippine National Police ken dadduma a maseknan nga ahensia kadagiti insidente a nagresulta iti panagpukaw ni PDEA Investigation Officer I Merton Fesway.
Paset daytoy ti panakikaykaysa ken panangsuportar ti lokal a gobyerno ti Bontoc ken dagiti umili daytoy iti pamilya ti mapukpukaw nga operatiba ti PDEA.
Maipalagip a rabii ti June 25 ket maatap a kinawtibo dagiti mapapati nga ‘state agents’ iti ruar a mismo ti PDEA Office sadiay Angeles City, Pampanga ken agingga ita ket awan ti pamalpalatpatan iti lokasyon daytoy.
Kidkiddawen met ni Bontoc Mayor Franklin Odsey ti panangited ti publiko iti tulong para iti panakasarak ti mapukpukaw nga anak ti ili.
Naamuan nga idi July 5 ket nagturong sadiay Pampanga dagiti miembro ti pamilya, kakabagyan ken kailyan ni Fesway para iti panagbirukda iti daytoy.
