BAGUIO CITY – Pinirmaanen ni Mayor Mauricio Domogan ti resolusyon ti City Council a mangipalpalubos iti panakaipaay ti konsiderasion iti closing time dagiti bar establishments wenno balay-paginoman ditoy siudad ti Baguio.
Inlawlawag ni Vice Mayor Edison Bilog a maipaay laeng ti nasao a konsiderasyon tapnu maipaayan met iti gundaway dagiti nabatbati a kostumer a mang-ibos iti ginatang dagitoy nga arak ti kanito a madanun ti naituding a closing time ti maseknan a balay-paginoman.
Kinunana a maipaayan iti umdas nga oras dagiti kostumer a mang-ibos iti nabatbati nga order dagitoy.
Nupay kasta, impettengna a nasken a masurot latta ti naituding nga oras ti operasyon dagiti bar establishments a kas nakalanad iti Liqour Ordinance of Baguio.
Inlawlawagna a nasken a sumurot latta dagiti bar owners iti oras a panagrikep dagitoy partikular dagiti addaan closing time nga alas-dos ti parbangon.
Kinuna met ni Baguio Association of Bars and Entertainers president Allan Bandoy a babaen iti nasao a konsiderasyon ket saandan a maki-apa kadagiti kostumer ken kadagiti pulis a mangmonmonitor kadagitoy.
Innayonna pay a gundawayanda ti nasao a konsiderasyon nga agdalus iti uneg ti balay-paginoman dagitoy.
