Naragsak nga impakaammo ni Burnham Park Fishing Tournament Organizer Rafael Serrano a napintas ken naragsak ti resulta ti kalleppas a 9th Fishing Tournament iti siudad ti Baguio idi napalabas a lawas.
Iti pannakiuman ti Bombo Radyo kenkuana, kinunana a saanda a ninamnama a ti nagkampeon iti daytoy agsipud ta awan paylaeng ti kapadasan daytoy iti fishing tournament.
Sigun kenkuana, ti nagkampeon iti daytoy ket ni Connie Mumatac no sadino daytoy ti kaunaan a nabanni-it iti tallo a lames nga addaan iti 20.5 inches ti kaattidog.
Ti second place met ket ni Crisanto Ballesca a nakabanni-it iti 12 inches a lames bayat a ti third placer ket ni Vincent Navalta.
Naipaayan metlaeng dagiti iti premyo no sadino ti kampeon ket nakaawat iti trophy ken P5,000 cash prize, 2nd placer ket nakaawat ti trophy ken P3,000 cash prize bayat a ti 3rd placer ket nakaawat metlaeng iti trophy ken P3,000 cash prize.
Malaksid iti dayta, naipaayan metlaeng amin dagiti 36 a participants iti daytoy iti libre a t-shirts.
Kinuna ni Serrano a dagiti kaadduan a lames a nabanni-itan bayat ti torneo ket ti tilapia, hipon, igat ken dadduma pay.
Innayonna metlaeng nga adu dagiti nakipaset iti daytoy no sadino adda dagiti taga Caloocan, Abra ken dadduma pay a lugar.
Kabayatanna, inyebkas metlaeng ni Serrano ti panagyammanna kadagiti amin a participants, kadagiti amin a nangsuportar kadakuada nangruna ti City Government Office ken dadduma pay.
Mainaig iti dayta, manamnama manen a maipatungpal ti Fishing Tournament iti siudad inton Hunyo, iti agdama a tawen.
