BAGUIO CITY – Nangisumitir iti surat ti Department of Agriculture (DA) – Cordillera iti opisina da Mayor Mauricio Domogan, Councilor Elmer Datuin ken iti Baguio Flower Festival Foundation, Incorporated a nakailanadan ti reklamo seknan iti nagbalin a resulta ti kompetisyon iti big float category iti Grand Float Parade iti Panagbenga 2018.
Kasaruno daytoy ti panangabak ti kompanya ti siomai (Master Siomai) iti nasao a kategorya.
Nailanad iti surat ni DA – Cordillera Regional Technical Director Danilo Daguio dagiti rason no apay a kukwestionaranna ti nagbalin a resulta ti kompetisyon.
Sigun kenkuana, saan a sinurot ti nangabak a float ti umno a tema a “Celebration of Culture and Creativity” gaputa nalawag a ti laeng produkto dagitoy a siomai ti naital-o ken dagiti mascots ket nakasuot iti chinese attire.
Kinunana a dakkel a saludsod no apay a nangabak ti maysa a float a saan a simmurot kadagiti pagalagadan malaksid a simple laeng ti desinyo daytoy.
Impettengna a nailanad iti pagalagadan ti judging a kasapulan nga iti las-ud ti biente kuatro oras ket maipreserba ti kinapintas ti float ngem iti kaso ti float ti nasao a siomai company ket saan a nabantayan gaputa naibusen dagiti sabong daytoy kalpasan nga inala dagiti nagpaala iti ladawan.
Gapu iti daytoy, kidkiddawen ti nasao nga ahensia nga agbalin a patas ti panakapili dagiti maikari a mangabak.
Naamuan a dumanon iti P450, 000 ti nabusbos ti DA iti float dagitoy a mangitatal-o iti “red rice” ken nasalun-at a panagbiag iti rehiyon Cordillera tapnu saan a malipatan dagiti agtutubo ti kultura iti panangipauneg iti nasao a kita ti innapoy.
Kabayatanna, nagkedked pay a mangipaay iti reaksyon ni Councilor Elmer Datuin, chairman ti Executive Committee ti Panagbenga 2018 seknan iti nasao a reklamo.
Sigun kenkuana, nabasana ti nasao a surat manipod iti DA ngem kinunana a kasapulan nga agpapatang pay dagiti miembro ti komite tapnu maymaysa ti agbalin a takderda ken mailawlawagda a naimbag ti nasao nga isyu.
Nupay kasta, impetteng ni Datuin a saan a maliklikan nga adda latta dagiti indibidual a mangtubngar iti anyaman a desisyon kas iti panakaideklara ti Baguio Central School kas kampeon iti Grand Street Dance Parade.
Naamuan a ti Department of Agriculture ti nagballigi iti Big Float Category ti Grand Float Parade idi 2017.
