BAGUIO CITY – Impetteng ni National Commission on Indigenous Peoples (NCIP) – Cordillera Regional Director Atty. Marlon Bosantog nga inimbestigaranda ti kontrata iti nagbaetan da Maria Oggay wenno “Apo Whang-od” ken ti Nas Daily Academy tapnu maipasigurado a saan a pagdaksan ti nalatak a traditional tattoo artist ti nasao a kontrata.
Iti interview ti Bombo Radyo Baguio, kinunana a kabayatan ti imbestigasyonda ket mismo a ni Apo Whang-od ken ti panakabagi daytoy ti nangkuna a saanda nga ammo ti nasao a kontrata a panangisuro daytoy ti panagbatek iti academy ti nasao nga online platform.
Impettengda nga awan ti probisyon ti nasao a kontrata a naipalawag kenni Apo Whang-od.
Naduktalan pay ti NCIP-Cordillera a naikabil iti kontrata nga eksklusibo a tagikua ti Nas Academy ti aniaman a content a maipabuya iti nasao a leksion ken ti linteg ti Singapore ti mangsakop iti nasao a kontrata.
Kinuna ni Atty. Bosantog nga iti panaka-ammo da Apo Whang-od ket ti kinabilan daytoy ti thumb mark ket para iti pammalubos iti panaka-ala ti video, interview ken ladawan-na.
Impetteng pay dagiti umili sadiay Kalinga a maawan ti pudpudno a kaipapanan ti panagbatek ken ti kinapateg daytoy iti kultura ti Kalinga no maisuro iti online platform.
VC BOSANTOG 1 (ni NCIP-CAR Regional Director Atty. Marlon Bosantog)
Kabayatanna, nakasagana ti NCIP-Cordillera a mangited ti legal assistance iti pamilya ni Apo Whang-od ken iti komunidad ti Kalinga iti kanito nga agdesisyonda nga agtuloy iti legal actions mainaig iti isyuda iti Nas Academy.
Kinuna pay ni NCIP-Cordillera Regional Director Atty. Marlon Bosantog a tarigagayda a mangbukel ti Kongreso iti napimpintas a linteg a mangprotektar iti Indigenous Knowledge Systems and Practices (IKSP) ti Cordilleras.
Sigun kenkuana, daytoy ket gapu iti makitkitan a panakagundaway ken panakai-commercialize ti kultura ti Cordilleras babaen kadagiti tattao iti ruar ti rehion.
Impettengna pay a nasken nga agala ti pammalubos iti komunidad ken adda ti koordinasyon kadagiti maseknan nga ahensia kas iti NCIP ken LGU no adda dagiti agpampanggep nga agisayangkat ti aktibidad iti masakupan ti ancestral domain iti rehion kas maitunos iti Indigenous Peoples Rights Act, nangruna no ti aktibidad ket mainaig iti IKSP.
Naamuan kenni Atty. Bosantog nga insumitirdan iti Central Office ti NCIP ken iti opisina ti Committee on Cultural Communities iti Senado ti resulta ti imbestigasyonda iti nasao nga isyu.
VC BOSANTOG 2 (ni NCIP-CAR Regional Director Atty. Marlon Bosantog)
