BAGUIO CITY – Maiyusuat ita nga aldaw ti Martes ti tallo nga aldaw a North Luzon mini-travel fair a masarakan sadiay Baguio Convention Center.
Sigun kenni Supervising City Tourism Operations Officer Engr. Aloysius Mapalo, agserbi nga special guest ni Tourism Secretary Bernadette Romulo-Puyat iti pormal a panakaiyusuat ti ‘Ridge and Reef Baguio-Ilocos Tours’.
Paset daytoy ti in-inot, naannad ken natalged a panakailukat ti industriya ti turismo iti lokalidad para iti overall plan a panakabiag manen ti ekonomiya iti Northern Luzon.
Maigiddan metlaeng a maiyusuat ti Baguio Visitors Information and Travel Assistance (VISITA) wenno ti online registration platform ti Baguio City para kadagiti agparehistro a taga-Region I a kayatda ti agbisita ditoy Baguio City.
Ditoy nga i-upload dagiti interesado a turista ti itinerary of travel, test results, travel authority ken pre-bookings kadagiti accredited accommodation establishments sakbayda a mapalubusan a sumrek iti siudad ti Baguio.
Inlukat metten dagiti tourism industry stakeholders manipud Pangasinan, La Union, Ilocos Sur ken Ilocos Norte dagiti bukodda a booth sadiay Baguio Convention Center tapnu ital-o dagiti tourist spots nga ilukatda met para kadagiti agbalin a bisitada manipud iti Baguio-Ilocos tourism corridor.
Kinuna ni Mapalo a naituding nga iyusuat met ti Ilocos Norte ti panaglukat ti turismo dagitoy inton October 1 bayat a sadiay La Union ket inton October 10.
Maibasar iti inisyal a plano, mailukat dagiti tourist destinations sadiay Manaoag, Alaminos City ken Bolinao iti Pangasinan; Bauang ken San Juan iti La Union; Bantay, Cauayan ken Vigan City iti Ilocos Sur; ken ti Laoag City, Paoay ken Pagudpud iti Ilocos Norte.
Nupay kasta, linawlawagan ni Mapalo a saan pay a mapalubusan a sumrek iti Baguio dagiti turista gapu iti panagngato ti kaso ti COVID-19 ditoy siudad kadagiti napalpalabas a lawas.
Inlawlawag met ni City Mayor Benjamin Magalong a saan pay a nakasagana ti sistema dagiti dadduma a probinsia iti Region 1 para iti nasao a plano.
Nupay kasta, impasiguradona nga inton sumaruno a lawas ket maipalubusen ti iseserrek ditoy Baguio dagiti turista manipud Region 1.
Naamuan nga ita kuma nga aldaw ti panakailukaten ti turismo ti Baguio City kadagiti turista manipud Region 1 babaen iti panagturongda kadagiti nagduduma a pagpasyaran ditoy City of Pines kas iti nalatak a Burnham Park.
