Nagprotesta ti rinibribu a tattao iti daya a siudad ti Valencia idiay Spain gapu iti nasapamak a panaglayos a nakatayan ti nasurok a dua gasut dua pulo a tattao iti maysa kadagiti makadadael a didigra iti pakasaritaan ti Europe.
Pinunno dagiti agprotprotesta ti sentro ti Valencia a mangimanmandato iti panagikkat ti regional government leader Carlos Mazon ken adu kadagitoy ti mangipukpukkaw iti “Mammapatay!”
Sumagmamano pay kadagitoy ti nangibarsak kadagiti narugit a botas iti ruar ti pasdek ti gobierno bayat a dadduma kadagitoy ket nangibarsak met iti pitak.
Inakusaran dagiti umili sadiay ni Mazon gapu iti naladaw a panangipaulogna ti alerto idi Oktubre baente nuebe kalpasan a napigsan ti panagtudtudona kadagiti asideg nga ili ken purok.
Sigun met iti nasao nga opisial, nasapsapa koma a nangipaulog iti alarma no napaamuan daytoy a nakaro ti agbalin a sitwasion babaen kadagiti opisial ti water monitoring body.
Iti agdama, walo pulo nga indibidual ti agtaltalinaed a mapukpukaw.
Manarimaan metten ti panagsapul dagiti otoridad kadagitoy.
