BAGUIO CITY – Nakipaset ti rinibribu nga examinees iti Philippine Military Academy Entrance Examination 2026 a naangay iti 13 a testing centers iti Northern Luzon manipud Setyembre 5 ken Setyembre 6.
Dagitoy ket dagiti agtartarigagay nga agbalin kas kadete ti Philippine Military Academy nga adda ti planona a sumrek ken agtrabaho iti Philippine Airforce, Philippine Army ken Philippine Navy.
Nagserbi kas testing center ti Northern ken Central Luzon partilukar idiay Laoag City; Tuguegarao City; Bontoc, Mt Province; Bayombong, Nueva Vizcaya; Baguio City; Lingayen, Pangasinan; Cabanatuan City; Tarlac City; Pampanga; Tabuk City; Cauayan City, Isabela; Baler, Aurora ken Olongapo City.
Dagiti examinees ket nag-apply online ken adda met dagiti walk-in applicants.
Dagiti makapasa iti nasao nga eksaminasyon ket maipasidong iti next phase ti Philippine Military Academy Cadet Admission Screening Process.
Daytoy ket pakairamanan ti kompleto a Physical, Medical, ken Neuropsychiatry Examinations a maipatungpal idiay Quezon City.
Dagiti kwalipikasyon sakbay a makipaset iti Philippine Military Academy Entrance Examination ket kasapulan nga agtawen iti 17 agingga 22, natural-born Filipino citizen, awanan asawa ken anak, nakaturpos iti Senior High School wenno high school nga addaan iti general average nga 85% agpangato.
Masapul a ti height ket 5 feet ken saan a lumabes iti 6’4 feet, addaan iti good moral character ken awanan iti administrative case.
Malakid kadagitoy, masapul metlaeng a physically ken mentally fit a sumabak iti military training.
Karaman met kadagiti benepisyo ti PMA cadet ket libre nga edukasyon, allowance, monthly salary a dumandanon Salary Grade 19, awtomatiko nga opportunidad a sumrek iti Philippine Army, Philippine Airforce, Philippine Navy ken Philippine Coast Guard, addaan pay iti tsansa nga agadal iti foreign academies, maipaayan iti exceptional training ken billeting facilities ken maaddaan iti prebiliheyo nga agserbi iti pagilian.
