BAGUIO CITY – Nangipatungpal dagiti pulis sadiay Tuba, Benguet iti ritwal a ‘daw-es’ kasaruno ti panakailista ti nasurok 160 a vehicular traffic incidents iti uneg ti umuna a lima a bulan ti agdama a tawen kadagiti kalsada iti masakupanda a munisipyo.
Sigun kenni PCI Acod, hepe ti Tuba PNP, naipatungpal ti ritwal iti aglawlaw ti municipal hall nga indauluan dagiti panglakayen sadiay.
Kinunana a panggep ti panakaipatungpal ti ‘daw-es’ nga awanen ti mapasamak nga insidente kadagiti masakupanda a kalsada kagiddan ti panagyamanda gapu iti saan a panakadangran dagiti dadduma kadagiti nairaman kadagiti nasao nga insidente.
Dinakamatna a manipud iti 160 a vehicular traffic incidents a nailista dagitoy manipud Enero agingga Mayo iti agdama a tawen ket pito kadagitoy ti nagresulta iti ipupusay ken ti kaudian ket ti panangdalapos ti maysa nga SUV iti innem nga indibidual a dagus a nakatayan ti dua a senior citizens sadiay Camp 4, Tuba, Benguet.
Innayonna nga idi laeng napalabas a bulan ti Mayo ket 30 a vehicular accident ti nailista dagitoy bayat a kaaduan a napaspasamak sadiay ket resulta ti ‘human error’ ken ‘mechanical defect’.
Sigun pay kenkuana, saanda latta a maum-uma a mangpalpalagip kadagiti motorista a dumaldalyasat kadagiti kalsada iti masakupan ti Tuba nupay ikamkampanyada ti panagaramat dagiti motorista iti Marcos Highway imbes nga iti Kennon Road.
