Agtultuloy ti panangipatungal ti Commission on Elections-Benguet iti roadshow wenno panangipakita iti publiko iti baro nga automated counting machines kadagiti nagduduma a munisipyo iti probinsya ti Benguet.
Iti pannakiuman ti Bombo Radyo kenni Atty. Elenita Julia Tabangin Capuyan, Provincial Election Supervisor 3 iti Commission on Elections-Benguet, kinunana nga agtultuloy ti roadshow no sadino nangrugi daytoy idi Disyembre a dos ken agleppas met daytoy inton Enero trenta, inton sumaruno a tawen.
Kinunana nga adda metten dagiti naka-scheduled nga aldaw a pagturungan dagiti election officers kadagiti nagduduma a munisipyo iti nasao a probinsya tapno maipakita ti umno a panagaramat iti baro a makina kas panagsagana iti 2025 national ken local elections.
Impeksa met ni Atty. Capuyan nga adayo a napinpintas, naparpardas ken hightech ti baro a makina no idilig iti sigud a makina a naar-aramat idi napalabas nga eleksyon.
Kinunana a bayat ti road show mangipaay dagitoy iti balota kadagiti makipaset a registered voters tapno padasenda met nga aramaten daytoy tapno maipaayan iti ideya iti umno a panagaramat.
Malaksid iti dayta, adda metten ti naituding nga aldaw a pakaangayan ti transmissing testing tapno maamuan ti internet capacities daytoy nangruna kadagiti naisulsulinek a lugar.
Nagpalagip met daytoy kadagiti rehistrado a botante nga agbalin a nalaing ken pilien a nasayaat dagiti ibutosda nga agserbi iti pagilian a Pilipinas.
