BAGUIO CITY – Nagsapatan ni Ibaloi tribal leader Roger Sinot kas Indigenous Peoples Mandatory Representative (IPMR) ti Baguio City iti lokal a konseho, partikular iti opisina ni City Councilor Atty. Faustino Olowan.
Inlawlawag ni Olowan nga indauluanna ti Oath of Office ni Sinot kas maysa nga abogado ken notary public.
Maipalagip a nakaala ni Sinot iti Certificate of Endorsement kalpasan ti panagadal ti Department of the Interior and Local Government ken National Commission on Indigenous Peoples (NCIP) en banc iti panakapili daytoy nga IPMR.
Inlawlawag ni Councilor Olowan a kalpasan ti pormal a panagsapata ni Roger Sinot ket isumitirna pay ti Oath of Office daytoy iti NCIP sakbay a naan-anay nga agtugaw iti konseho.
Naamuan met nga awan pay ti naituding nga opisina para kenni Sinot ken awan met laeng ti nailatang a pondo para iti IPMR iti naaprobaran a 2018 City Annual Budget.
Impetteng pay ti konsehal a ti laeng Temporary Restraining Order ti mabalin a manglapped iti panagtugaw ni Sinot iti lokal a konseho ti siudad ti Baguio.
