Nagkiddawen ti pammakawan wenno dispensar ni guitar entertainer Romeo Ogong wenno am-ammo iti awag a Southern Cowboy kadagiti nainsulto iti panagangaw daytoy kabayatan ti panakipagrambakna iti maika-17 nga Ibaloy Day idi February 23.
Iti press conference idi kalman a naangay idiay Ibaloy Park, impeksa ni Ogong a saanna nga intensyon nga insultwen ti aniaman a sektor wenno komunidad iti Baguio City gapu iti gender-based a panagangawna.
Innayonna a saan a nagturong daytoy iti siudad tapno gudwaen ti kapanunutan dagiti umili nangruna ket mairamramanen ti maipapan iti pulitika-banag a kinunana a saan a nasayaat.
Nupay kasta, impanamnama daytoy a saan a pumanaw iti rehion COrdillera ken agtultuloy latta ti panagkansion ken panagpabuyana.
Maipalagip a kadagiti napalabas nga al-aldaw ket kiniddaw dagiti daduma ti panakaideklara ni Ogong kas persona non grata iti Baguio City gapu iti nasao a klase iti panagangaw.
Daduma ket umanamong iti daytoy bayat a dagiti daduma ket saan nu sadino, sagun kadagitoy ket umdasen ti panangipaayna iti public apology.
Nupay kasta, inlawlawag metten ti maysa a konsehal iti siudad a saan a basta-basta nga ideklarada a persona non grata ti maysa a tao gapu ta kasapulan a madengngeg pay ti bennegna ken adda ti due process a rumbeng a masurot.//Bombo News Team
