BAGUIO CITY – Inyusuaten ti Philippine Red Cross (PRC) – Baguio Chapter ti RT-PCR Saliva testing babaen iti saliva collection sadiay Melvin Jones Grandstand.
Iti interview ti Bombo Radyo Baguio kenni PRC-Baguio Administrator Anastacia Tamayo, kinunana a paset daytoy ti panangsuportarda iti kampanya ti lokal a gobyerno a malapdan ti ad-adda a panakaiwaras ti COVID-19 iti lokalidad.
Dinakamatna nga adda ti mabayadan a P2,000 ken nasken nga agpa-book nga umuna iti website ti PRC sakbay nga agturong iti saliva collection site.
Sigun kenkuana, 10 laeng a minuto ti proseso ti saliva testing ken maysa laeng nga aldaw ti mauray sakbay a rumuar ti resulta gaputa maipatulod pailaeng dagiti nakolektar nga specimen iti Molecular Laboratory.
Inyunay-unayna nga accurate ti resulta ti saliva testing ken addaan ti 98.6% nga effectivity rate kas maibasar iti panagadal ti Department of Health.
Imbinglayna pay nga ita ket bassit paylaeng dagiti nakarehistro iti website dagitoy isut gapuna nga aw-awisenna dagiti umili ti siudad tapnu suportaranda ti nasao a programa para iti kinatalged ken pagsayaatan ti amin kontra iti COVID-19.
