Impanamnama ni United States President Donald Trump nga immannugot ni Russian President Vladimir Putin a saan nga umatake idiay Ukraine iti makalawas kagiddan ti mapaspasaran a nalamiis unay a temperatura sadiay a mangparparigat iti kasasaad dagiti Ukrainian.
Nupay kasta, saanen a dinakamat ni Trump nu kaano a naaramid ti nasao a tungtungan ken nu kaano daytoy nga agepektibo.
Iti agdama, mangnamnama ti Ukraine iti panangtungpal ti Russia iti daytoy ngem agdudua ni Ukrainian President Volodymyr Zelenskyy nangruna ket dandanin madanon ti maikapat a tawen sipud nairugi ti all-out invasion ti Russia idiay Ukraine idi February 24, 2022.
Malaksid iti dayta, patien paylaeng ni Zelenskyy nga awan ti makitkitana a gagar ti Russia a mapagnunumwan ti peace settlement iti baet ti panakaisakad daytoy.
