TUBA, BENGUET – Agpalpalagip manen dagiti barangay officials ti Poblacion, Tuba, Benguet kadagiti residente ken turista a saanda nga ap-apan iti Mt. Cabuyao.
Kasaruno daytoy ti insidente ti pannakatnag bayat ti panagpapicturena a nangitunda iti ipupusayna.
Iti interview ti Bombo Radyo, kinuna ni Dan Batio-an, Barangay Kagawad ti Poblacion, Tuba, Benguet, ti nasao nga insidente ti kaunaan a nailistada iti nasao a bantay.
Sigun kenni Batio-an, ti Mt. Cabuyao ket napegged agsipud ta nangato ken kabatbatoan daytoy.
Maipalagip a pinaritan ti gobierno dagiti bisita nga apan idiay Sitio Pungayan, Poblacion, Tuba, Benguet wenno ti maaw-awagan a “La Presa” para iti implementasyon ti Permanent Environment Protection Order (PEPO) nga impaulog ti Court of Appeals idi Mayo 2015.
Gapu iti daytoy, dagiti laeng permanente a residente ti addaan iti access iti nasao a lugar.
Inyunay-unay ti nasao nga opisyal a nu adda man ti maisayangkat nga aktibidad iti nasao a lugar ket kasapulan nga agala iti permit ken certification.
Impeksana pay a nainget ti panagbantay dagiti security ken kameng ti Department of Environment and Natural Resources iti gate isunga awan dagiti turista a makaturong sadiay.
Sigun met kadagiti barangay health workers iti nasao a lugar, adda ti inaramidda nga alad ken signage tapno awan ti sumrek iti Mt. Cabuyao ngem namin-ado a daras a nadadael.
Inlawlawag met ni Barangay Kagawad Batio-an a saan nga innoras ket mabantayanda dagiti agturong iti Mt. Cabuyao rason nga ad-adalenda ti pannakaimuntar ti natibtibker nga alad ken signage iti nasao a bantay.
