BAGUIO CITY – Maiyap-apela ti saan a panangpangta dagiti umili kadagiti health workers nga agserserbi iti probinsia nangruna ita a manarimaan paylaeng ti pandemya gapu iti COVID-19.
Sigun kenni Governor Melchor Diclas, adda dagiti naiyuman kadakuada nga adda dagiti dadduma nga agipangpangta kadagiti dadduma a health workers isut gapuna a kidkiddawenn ti panakaisardengen ti nasao a panagpangta.
Impettengna a dakkel ti panagsakripisyo nga ipapay dagiti health workers kadagiti umili no sadino, adu ti inalada a health workers nga agtrabaho iti Benguet General Hospital (BeGH) tapnu laeng maasikaso a naimbag dagiti pasyente a maiturturong sadiay kabayatan ti pandemya.
Dinakamatna nga addan dagiti health workers a nagikkat iti trabahoda gapu iti panakabannog malaksid pay nga adda dagiti nagannak a mangipaspasardeng iti panagtrabaho dagiti health workers nga annakda.
Impettengna pay a saan a pudno ti pammati dagiti sumagmamano nga umili a pagkukwartaan dagiti health workers iti probinsia dagiti pasyente a makapkaptan ti COVID-19.
Dinayaw ken pinagyamananna dagiti amin a health workers nga agserserbi iti probinsia ti Benguet.
Kabayatana, inyapela met ni BeGH chief of hospital, Dr. Meliarazon Dulay ti saan a panagpangta kadagiti health workers nga agserserbi kadagiti umili iti baet ti panakabannog ken panakapuyat dagitoy gapu iti nadagsen a trabahoda ita a pandemya.
Kagiddan iti daytoy ket impanamnamana nga agtultuloy latta ti panagserbida kadagiti umili, saan laeng nga kadagiti pasyente a nakaptan ti COVID-19 ngem iti amin nga kasapulan ti tulong iti medikal.
