Impasigurado ni Senador Grace Poe a saan a mapasamak ti pannakapukaw ti trabaho dagiti motorcycle riders iti laksid ti “impasse” iti pannakaipaulog ti linteg a mangpabalin a ligal ti motorcycle taxi iti pagilian.
Para kenni Senador Poe, napateg ti serbisio dagiti “motorcycles for hire,” ken saan a rumbeng nga isardeng ti LTFRB gapu laeng ta saan pay a naipasa ti linteg.
Patien ni Poe a ti kinaawan ti regulation law ket saan koma a rason ti pannakapukaw ti trabaho para iti nasurok 60,000 a Pilipino a mangmangged kas motorcycle riders ken mabalin nga ipaulog ti Senado ti resolusion a mangsuporta iti pannakailaylayon para iti “legal coverage” dagitoy.
Mabalin gamin nga iligal ti LTFRB no mapaay a mangipasa ti linteg ti 19th Congress.
Iti agdama, agop-operate paylaeng dagiti motorcycle taxi babaen ti pilot program a nairugi idi 2019.
Panggep ti programa a sukimaten ti pagbiagan ken kinatalged dagiti motorcycle-for-hire kas pagpilian a transportasion ti publiko.
Kabayatanna, kinuna ni Senador Poe nga adalen paylaeng dagiti senador ti gakat ta kayatda nga agbalin a “very specific” ken komprehensibo ti gakat.
