Kinemmeg dagiti kameng ti National Bureau of Investigation ti saan a pudno nga abogado iti uneg mismo ti korte.
Sigun iti Integrated Bar of the Philippines, inaramat ti suspek ti nagan ti maysa nga abugado a pimmusayen tapno agsapul ti kliyentena.
Kinemmeg ti National Bureau of Investigation Special Task Force ti lalaki iti korte kalpasan a nagpa-amammu a ni Attorney Epafrodito Nollora.
Nagduadua ti piskal kadagiti dokumento nga insubmitir ti suspek iti korte, ken nasukimat nga agar-aramat ti nagan ti dadduma nga abogado.
Nagduadua metlaeng ti National Bureau of Investigation idi nagturong iti law firm wenno opisina ti suspek.
Inaklon ti suspek a maikadua a gundaway ti kaso a sangsanguenna nga agpampammarang nga abogado.
Ngem impaganetgetna a daytoy ni Nollora.
Sigun iti maysa a report, pinasingkedan ti Court of Appeals idi 2022 ti innem a tawen a pannakaibalud ti maysa a Pedro Pequero gapu iti panangusarna iti nagan ken pakabigbigan ti maysa nga Atty. Epaphrodito Nollora a pimmusay idi 1986.
Pinasingkedan pay ti Court of Appeals ti P12,000 a multa nga impataw ni Pequero babaen ti Rizal Regional Trial Court.
Ti Integrated Bar of the Philippines ti nagreklamo iti agpada a kaso ti suspek.
Ti Korte Suprema ti nangibaga a pimmusayen ti pudno nga Atty. Nollora.
Naibaluden ti suspek iti kaso nga usurpation of authority ken perjury.
Ginuyugoy met ti National Bureu of Investigation ken Integrated Bar of the Philippines dagiti dadduma a kliyente ti suspek a makitinnulongda iti opisina dagitoy.
