BAGUIO CITY – Umap-apela dagiti truckers iti La Trinidad Vegetable Trading Post a saanda a koma a mapilit nga umaakar iti Benguet Agri-Pinoy Trading Center wenno BAPTC kasaruno ti pammilin ti mayor a temporaryo panangbakante dagitoy iti parking area sadiay Km. 5, La Trinidad, Benguet para iti maipatungpal nga Agri-Tourism Fair ti Strwaberry Festival.
Sigun kenni Agot Balanoy, general manager ti maysa a farmer’s cooperative, ado dagiti naapektaran iti nasao a pammilin nangruna ta naipawil pay ti panakaaramat dagiti truckers a mangibunag kadagiti nateng.
Gapu iti daytoy, kinunana a naaddaan iti taripnong dagiti stakeholders iti Trading Post ken ni Mayor Romeo Salda a maitantan pay laeng ti temporaryo a panagakar dagiti truckers.
Mainaig iti daytoy, naamoan a napagnunumuanda nga inton Pebrero 25 nga agakar dagiti truckers ngem saan nga amin ket agturong iti BAPTC gaputa dagiti dadduma ket pilyenda nga agparada kadagiti pribado a pagparaddaan sadiay Pico nga asideg iti Trading Post.
Naamuan a kangrunaan a reklamo dagiti truckers ti kaadayo ti BAPTC iti Trading Post.
Immunan a nangipaulog iti pammilin ni Mayor Salda iti panagakar dagiti truckers nga epektibo idi Pebrero 13 ngem gapu iti napasmak ket naitantan daytoy inton Pebrero 25.
