BAGUIO CITY – Immapela ni Kapitan Ramon Tomin ti Barangay Balili, La Trinidad, Benguet kadagiti residente sadiay a saan dagitoy nga agibelleng iti basurada iti Balili River.
Inyunay-unayna a babaen iti daytoy ket matungpal ti plano ti DENR-Cordillera, LGU ti La Trinidad ken ti Benguet State University a maisubli ti sigud a kinadalus ti nasao a karayan.
Kinunana a kanayun dagitoy nga agturturong kadagiti babbalay sadiay kadwada ti sanitary inspector dagitoy tapno makita no siasino dagiti nangipaturong iti septic tank ken lababo dagitoy iti karayan.
Innayonna a bagaanda laeng dagiti umili sadiay ken ipaayanda dagitoy iti pakdaar tapnu itarimaanda dagiti tubo nga inturongda iti karayan ken kanayunda metlaeng a bagbagaan dagiti agpapaabang nga istriktoanda dagiti boarders dagitoy tapno ammoda ti pangibelbelenganda iti basura dagitoy.
Kinunana nga iti kanito nga adda ti matiliwan dagitoy a boarder ket ti landlord dagitoy ti mangikalintegan kadakuada.
