Manarimaan latta ti panagsapul dagiti Taiwanese rescuers kadagiti sangapulo ket walo nga indibidual a mapukpukaw kalpasan ti panagdayyeg ti 7.2 a gingined idiay Taiwan idi Miyerkules.
Karaman kadagiti mapukpukaw iti nasao a bilang ket ti uppat a ganganaet a nailista kas Indian, Canadian ken Australian a saan pay a nalawag nu sadinno ti lokasion dagitoy.
Malaksid iti dayta, mapukpukaw pay ti innem nga indibdiual bayat ti hiking wenno panagsang-atda iti kabambantayan.
Dumanon iti uppat a pulo ket lima a rescuers ti mangsapsapul kadagiti mapukpukaw iti maysa a bantay.
Kabayatanna, kinumpirmar dagiti rescuers a dumanon iti uppat a gasut nga indibidual iti uneg ti maysa a hotel a narba idiay Taroko Gorge national park ti natalged nu sadinno agtultuloy ti panangipaay dagiti otoridad ti abasto ti makan babaen ti helicopter bayat a dagiti sumagmamano kadagitoy ket nairuar nangruna kadagiti nadangran.
