Sumangsango iti kaso nga obstruction of justice ti sangapulo ket walo a miyembro ti Kingdom of Jesus Christ kalpasan ti maatap a panangipurwak dagitoy iti bote, tugawan ken daduma pay a banag kadagiti pulis kabayatan ti panaka-“disperse” wenno panakadadael ti barikadada iti Kingdom of Jesus Christ compound sadiay Davao City idi kalman.
Nagbalin a tensionado ken ado ti nadangran kalpasan ti impatungpal dagiti otoridad a panangpapanaw kadagiti agproprotesta iti KOJC compound a nagresulta iti panakadangran dagiti innem a pulis.
Nu pay kasta, nangipatungpal dagiti tagasuporta ni Pastor Apollo Quiboloy iti prayer rally idi alas-sais ti sardam idi kalman ken ditoy a nagbarikadada manen.
Ditoy a sumagmamano kadagiti tagasuporta ni Quiboloy ti nangpoor kadagiti piled ti lugan kasta met a pinapapanawda dagiti luglugan a pakairamanan dagiti patrol car.
Iti sabali a bangir, naituding a mangipila iti kaso ti Kingdom of Jesus Christ kontra kadagiti pulis gapu iti saanda a panagrespeto iti human rights.
Ngem, inkalintegan ti Davao Regional Police Office a ligal ti aksyon dagitoy gapu ta dakkel ti probabilidad nga adda ni Quiboloy ken dagiti daduma nga akusado iti nasao a compound.
