Impakaammo ni Itogon Mayor Bernard Waclin, a nagbakwit dagiti sangapulo ket walo a pamilya idiay Acupan, Virac, Itogon, Benguet gapu iti napasamak a panagreggaay idi laeng agsapa.
Iti pannakiuman ti Bombo Radyo kenkuana, kinunana a dagus nga imbilinna ti panagbakwit dagitoy agsipud ta narisgo wenno delikado ti aglawlaw ti nasao a lugar.
Gapu iti dayta, temporaryo paylaeng nga agnanaed dagitoy iti Malasin evacuation center bayat a dagiti dadduma ket nakidagus kadagiti pagtaengan dagiti kakabagyanda.
Malaksid iti dayta, kinanselarna metlaeng ti klase dagiti estudyante idiay Acupan Elementary School iti nasao a barangay iti tallo nga aldaw mangrugi inton bigat agingga inton biyernes.
Innayonna metlaeng a mangipatungpal dagitoy iti survey tapno masukimat ti kasasaad ti nasao a lugar para iti seguridad dagiti umili.
Malaksid iti dayta, sukimaten metlaeng dagitoy no adda ti mabalin a pagnaan dagiti mangtarimaan iti daytoy.
Kabayatanna, agtultuloy latta ti panangpalagip ti nasao a mayor kadagiti umili sadiay partikular kadagiti small scal miners a liklikan nga agminas partikular no adda ti bagyo.
