Pinatgan ti Regional Trial court sadiay Lapu-Lapu City, Cebu nga agpiyansa ti contractor a ni Sarah Discaya iti P1 million iti kasona a malversation of public funds ken violation of the anti-graft law.
Mainaig paylaeng daytoy iti maatap a ghost project sadiay Davao Occidental.
Malaksid iti dayta, pinalubusan metlaeng ti korte nga agpiyansa iti P300,000 ti finance officer ti Department of Public Works and Highways (DPWH) sadiay Davao Occidental a ni Czar Ryan Ubungen.
Maibasar iti maika-15 a panid ti resolusion, kinuna ni RTC Branch 27 Presiding Judge Nelson Leyco a napaay dagiti prosekutors a mangipresenta iti umdas nga ebidensiya tapno agtalinaed da Discaya len Ubungen iti pagbaludan, iti agdama.
Malaksid iti dayta, awan ti nagtestigo kabayatan ti bail hearing mainaig iti pannakipaset ni Discaya iti Malita project.
Inkosidera metlaeng ti korte ti statement ti prosecution witness a sigud nga empleyado ti St. Timothy Construction nga awan ti personal a pannakammona maipapan iti partisipasion ni Discaya iti ghost projects.
Sigun pay iti korte, dagiti ebidensia nga indatag ti prosekusion, agingga ita, ket saan a mangpaneknek kadagiti dokumento a nakikumplot ni Discaya kadagiti dadduma nga akusado iti kaso.
Iti baet dayta, sumangsango ni Discaya iti non-bailable case a naipila kontra kenkuana ken ti asawana a ni Pacifico “Curlee” Discaya.
Mainaig met daytoy iti maatap a P53.9 million ghost project sadiay Calumpit, Bulacan.
