BAGUIO CITY – Temporaryo a mairikep ti La Trinidad Vegetable Trading Post para iti disinfection ken contact tracing kadagiti nakapulapol dagiti stakeholders sadiay a nagpositibo iti COVID-19.
Nailanad iti Executive Order No. 96, series of 2020 a pinirmaan ken impaulog ni Mayor Romeo Salda nga iti naisayangkat a mass swabbing activity ket rimwar iti resulta a 12 nga stakeholders, partikular ti packers ken porter iti nasao a trading area ti nagpositibo iti COVID-19.
Gapu iti daytoy, kinunana nga adda ti pagkasapulan para iti temporaryo a panakairikep ti La Trinidad Vegetable Trading Post.
Maibasar iti pammilin, naipalubos ti panakaiserrek dagiti nateng iti La Trinidad Vegetable Trading Post agingga alas dose ti pangngaldaw ita nga aldaw ti Sabado, November 7 ken inton malem ket maisayangkat ti disinfection.
Maipalubos manen ti panakaiserrek dagiti nateng sadiay iti alas-siete intun bigat, November 8 ken iti nasao nga aldaw ket nainget a maimplementar ti “No Swab Result, No Entry Policy” kadagiti traders, packers, porters ken truckers.
Nasken pay a masurot ti panagsuot ti face mask iti amin a gundaway sadiay ken maipawil ti panagsuot ti slippers, short pants ken sando.
