BAGUIO CITY – Naiyusuat ti School-Based Feeding Program (SBFP) iti rehion Cordillera a maysa kadagiti kangrunaan a programa ti Department of Education (DepEd) para iti School Year 2021-2022.
Sigun kenni Edgar Madlaing, Chief Education Supervisor ti Education Support Services Division ti DepEd-Cordillera, puntirya ti programa a maaksionan ti kinakurang ti nutrisyon kadagiti estudyante a dakkel a mangap-apektar iti attendance ken abilidad dagitoy nga agadal.
Dinakamatna a nabigbig ti nasao a programa kas maysa kadagiti addang ti gobyerno nga agresponde kadagiti undernourished learners kabayatan ti pandemya.
Sigun kenkuana, manipud iti sigud a konsepto a panakaited ti hot meals kadagiti benipisaryo nga ubbing ket agbalinen a nutritious food products ken pasteurized wenno sterilized milk ti maiwaras kadagitoy.
Dinakamatna nga adda ti P68.9-M a nailatang a pondo para iti implementasyon ti nasao a programa iti rehion Cordillera ken puntiryada nga agnumar ditoy ti 36,255 nga estudyante.
Sakupen ti programa dagiti amin a sumrek iti kindergarten ken dagiti undernourished learners manipud iti Grade 1 agingga Grade 6.
Maipaayan dagiti benipisaryo ti nutritious food products iti uneg ti 60 feeding days ken pasteurized wenno sterilized milk iti uneg ti 33 feeding days.
Sigun pay kenni Madlaing, nalpasen ti supply mapping ti ahensia tapnu maamuan no umdas dagiti nutritious food products ken gatas kas maibasar iti agbalin a demand ti programa.
Innayonna a nakasaganada a mangituloy iti SBFP ken ti panaki-partner kadagiti available ken able stakeholders tapnu mapatibker ti implementasyon ti nasao a programa.
Kabayatana, impannakkel ni Edgar Madlaing, Chief Education Supervisor ti DepEd-Cordillera – Education Support Services Division a rinibribo nga estudyante iti rehion Cordillera ti nagnumar iti School-Based Feeding Program (SBFP) ti DepEd iti napalabas nga school year.
Sigun kenkuana, nasurok iti 25,200 nga ubbing ti nakaawat ti nasusustansia a taraon iti sidong ti nutritious food products component ti SBFP bayat a nasurok 17,200 wenno 80% kadagitoy ti nakaawat ti pasteurized wenno sterilized milk iti sidong ti milk component ti SBFP.
Dinakamatna a ti nabatbati a 20% kadagiti benipisaryo idi napalabas nga school year a saan a nakaawat ti gatas ket maawatda daytoy ita a bulan agingga inton sumaruno a bulan ti Oktorbre.
Naamuan a naimplementar ti SBFP idi napalabas a tawen kadagiti 1,025 a pagadalan iti rehion a nagnumaran dagiti amin a nag-kindergarten, severely wasted learners ken wasted learners iti Cordillera.
