Nakasaganan ti Department of Health (DOH) ken ti Department of Education (DepEd) para iti school-based nationwide vaccination program a maipatungpal inton Lunes.
Sigun iti gobyerno, ti National Immunization Program (NIP) ket addaan panggep a mangprotektar kadagiti ubbing kadagiti vaccine-preventable diseases (VPDs) kas iti measles, rubella, diphtheria, tetanus, ken cervical cancer kadagiti amin a parapubliko a pagadalan iti intero a pagilian.
Kinuna ni Health Promotion Bureau (HPB) Central Office head, Dr. Dominic Maddumba, daytoy a programa ket para kadagiti estudyante manipud Grades 1 agingga Grades 7 nu sadino para kadagiti Grade 4 a babbai ket maipaayan dagitoy iti bakuna kontra iti human papillomavirus (HPV) ken cervical cancer.
Impasigurado met ti Department of Health a dagiti bakuna a maipaay ket natalged ken epektibo.
Nu pay kasta, dagiti estudyante ket mabakunaan laeng nu daytoy ket inaprobaran dagiti nagannakda babaen iti panagpirmada iti consent form rason a saan daytoy a mandatory.
Manamnama nga iti panakabakuna dagiti ubbing ket makapasar dagitoy iti side effects ngem mild laeng daytoy ngem nu grabe ti epekto daytoy, mabalballaagan dagiti nagannak nga iturongda a dagus dagiti annakda iti ospital.
Idi napalabas a bulan ti Setyembre iti agdama a tawen, nanayunan ti pondo ti National Immunization Program (NIP) iti P2.3 billion para iti panakaimplementar ti vaccination iti intero a pagilian babaen ti panagsuporta ni President Ferdinand “Bongbong” Marcos Jr.
