Impeksa ti Department of Education (DepEd) nga agingga ita ket agkurkurang paylaeng ti silid dagiti Schools Division of Baguio City.
Sigun kenni Dr. Sorayo Facullo, Schools Division Superintendent ti Department of Education Baguio nga agarup 132 pay ti kasapulan a baro a classroom para iti siudad.
Maibasar iti report ti DepEd Baguio, dumanon iti 67 a public schools ken 75 a private schools ti fully operational.
Dumanon iti agarup 59,353 a learners dagiti adda iti public schools ken agarup 27,921 dagiti adda iti private schools.
Mainaig ti dayta, dumanon iti 2,199 a classrooms manipud ti kinder agingga ti Grade 12 iti public schools ti nairecord nga adda iti nasayaat a kasasaad bayat a 439 a classrooms ti maipasidong iti minor repair; 382 ti kasapulan a maipasidong iti major repair.
Impeksa ti nasao a Superintendent nga agtultuloy ti panakikoordinar dagitoy iti opisina ti Congressman ken Mayor tapno masolusionan ti kinakurang ti classroom.
Innayonna pay nga agtultuloy metlaeng ti panagsapul dagitoy ti partners wenno maaramat ti existing funds tapnu masolusionan ti parikut.
Innayon ni Dr. Facullo, a maysa a classrom ti maakomodar dagiti 25 a bilang ti Kinder agingga ti Grade 3.
Mainaig iti dayta, maysa a classroom ti aramaten dagiti 35 nga estudiante iti Grades 4 agingga 6; maysa a classroom para kadagiti 45 a bilang dagiti Junior High School ken maysa a classroom kadagiti 40 a bilang dagiti Senior High School.
Gapu iti kinakurang dagiti classrooms, pamuspusan dagiti sumagmamano a pagadalan nga agkurkurang ti classrooms nga aramaten paylaeng dagiti classrooms nga addaan iti minor repairs ken major repairs.
Iti agdama, ti Baguio Central School, Baguio National High School, Rizal Elementary ken National high school ti kaaduan iti bilang dagiti learners.//Bombo Noveh Organo
