Impasigurado ti Iran iti pagilian a Pilipinas a natalged a dumalan dagiti barko nga addaan ti bandera ti Pilipinas ken amin a FIlipino seafarers iti Strait of Hormuz, sigun iti Department of Foreign Affairs (DFA) idi kalman, Abril 2.
Apektado ti Strait of Hormuz gapu iti agtultuloy a gubat idiay Middle East a nakaapekto iti suplay ti produkto a petrolyo iti pagilian a Pilipinas.
Sigun iti Department of Foreign Affairs, naadaan iti agreement iti nagbaetan ti dua a pagilian kalpasan iti phone conversation da Foreign Affairs Secretary Ma. Theresa P. Lazaro ken Iranian Foreign Minister Seyed Abbas Aragchi.
Innayon ti nasao nga ahensya nga impasigurado ti pagilian nga Iran a palubosanda ti natalged, naannayas, ken napartak a panagdalyasat dagiti barko ti Pilipinas sadiay.
Kalpasan daytoy a kiniddaw ti pagilian a Pilipinas nga ibilang ti Iran a “non-hostile country” tapno masigurado a natalged ti panagdalyasat idiay Strait of Hormuz no sadino dumaldalan iti 20% iti suplay ti produkto a petrolyo ken liquefied natural gas iti world market.
Sigun pay iti nasao nga ahensiya, napateg ti nasao nga addang tapno maprotektaran dagiti seafarer ken masigurado ti seguridad iti suplay ti enerhiya iti pagilian. //bombokaren.c.s
