Kidkidawen ita ti Department of Foreign Affairs (DFA) iti China a siguradoen ti nasayaat a kasasaad ti agarup 100 Pilipino a naarestar sadiay gapu iti maatap nga ilegal a panagtrabaho ken panagtaeng iti nasao a pagilian.
Kinumpirmar metlaeng ti nasao nga ahensya ti pannakaarestar dagiti nasao a Pilipino kalpasan nga inwaragawag ti Chinese Foreign Ministry a nangisayangkatda iti aksyon kontra iti agarup 100 a Pilipino a mapagduaduaan nga ilegal nga agtatrabaho iti pagilian a China.
Impeksa metlaeng ti DFA a bigbigbigenda ti karbengan ti China iti panangipatungpal kadagiti bukod da nga immigration laws la kitdi surotenda ti umno a proseso.
Iti baet dayat, kinidaw ti DFA kadagiti otoridad idiay China nga agywananda ti kasasaad dagiti Pilipino a nakabalud ken dagos nga ipakaaamoda iti Philippine Foreign Service Posts ti sitwasyon dagitoy.
Nakikoordinar metten ti nasao nga ahensya iti embahada ti Pilipinas idiay Beijing ken iti Philippine Consulate-General idiay China tapno maamuwan ti eksakto a bilang dagiti naarestar a Pilipino ket dagiti pudno a rason iti pannakaibalud dagitoy.
Kabayatanna, binabalaw ni Defense Secretary Gilbert Teodoro ti inaramid ti China a panagaresto kadagiti Pilipino no sadino inawaganna na panang-“blackmail’ ti inaramid da ken binabalawna ti maatap a panangaramat kadagiti Pilipino tapno makibiyang iti proseso ti panangipatungpal iti linteg ti Pilipinas. //bombokaren.c.sapirao
