Nasayaat itan ti sitwasyon ti siltation dam iti City Camp Lagoon sadiay Lower Rock Quarry, Baguio City iti baet a napigsa ti panagbayakabak ti tudo.
Iti pannakiuman ti Bombo Radyo kenni Silvino Cominga Jr., Barangay Kapitan ti Lower Rock Quarry, Baguio City, kinunana a nasayaat ti kasasaad daytoy babaen iti kooperasyon ti publiko nangruna ti pannakaimuntar dagiti screen iti tunggal boundaries iti tunggal barangay nga asideg iti nasao a siltation dam.
Gapu iti dayta, nakatulong daytoy a mangsarapa kadagiti basura a sumrek sadiay.
Kinuna pay ni Cominga nga adda dagiti nakatoka nga agdalus tunggal screen kasta metten ti clean up drive dagitoy a maipatpatungpal.
Impettengna a kanayon a mamonitor dagiti nakaschedule nga agdalus tapno sumurot dagitoy rason a bimmasit ti basura a makolkolektar sadiay.
Nupay kasta, agtultuloy latta ti information education campaing nga ipatpatungpal dagitoy para iti pagsayaatan ti tumunggal maysa.
Kagiddan dayta, nagkiddaw daytoy iti kooperasyon ti publiko babaen iti panangsurot iti pagalagadan tapno saan manen a mapasaran ti panaglayos iti masakupanda a lugar.
