Saan pay a simmardeng dagiti otoridad iti panagsapol iti bagi ti 16-anyos a lalaki a mapapati a naiyanod ken nalmes iti creek idiay Mamaga Balili, La Trinidad, Benguet idi pay September 1, 2024.
Sigun kenni Yoshi Labi, opisyal iti Municipal Disaster Risk Reduction and Management Office iti La Trinidad, nakikoordinardan kadagiti kapada nga opisina idiay La Union nga ipakaammo dagitoy kaspangarigan masarakanda ti bagi ti nadakamat nga indibidwal.
Imbinglay ni Labi a saan pay a simmardeng dagiti personnel iti opisinada iti search and retrieval operation kadwada dagiti kameng iti pulisya.
Nupay kasta, simmardengen ti daduma kadagiti volunteers a makipaset wenno mangipatungpal iti nasao nga operasyon.
Inaklon ni Labi a maysa kadagiti karit iti panagsarakda iti mapukpukaw a bagi ti danom iti creek a narugit ken pasaray umadalim rason a marigatan dagitoy.//Bombo Rob Dominguez
