Muli nang tatanggap ang Securities and Exchange Commission (SEC) ng aplikasyon para sa mga bagong online lending platforms simula Agosto 1, 2026, matapos alisin ang halos limang taong moratorium na ipinatupad laban sa mapagsamantalang digital lenders.
Sa ilalim ng SEC Memorandum Circular No. 20, Series of 2026, inihayag ng ahensya na papayagan ang mga bagong online lending apps, ngunit sasailalim ang mga ito sa mas mahigpit na regulasyon upang maprotektahan ang mga nanghihiram.
Kabilang sa mga bagong patakaran ang obligadong malinaw na pagbubunyag ng loan terms, tahasang pahintulot ng borrower bago ma-release ang loan, mas mahigpit na proteksyon sa personal na impormasyon, limitasyon sa bilang ng lending apps na maaaring patakbuhin ng isang kumpanya, at mas mataas na capitalization requirements.
Nagbabala rin ang SEC na ang mga kumpanyang lalabag sa mga panuntunan ay maaaring masuspinde, pagmultahin, o tuluyang mawalan ng rehistro.
