Pinaregta ni Presidente Ferdinand “Bongbong” Marcos Jr. ni sigud a presidente Rodrigo Duterte tapno ilawlawagna iti publiko ti “secret deal” dagitoy iti pagilian a China bayat ti administrasion na.
Kasaruno daytoy iti kinuna ti China embassy sadiay Manila nga immanamong ni Duterte nga imanihar dagitoy ti aktibidad ti pagilian iti West Philippine Sea (WPS).
Nupay kasta, patien ni Presidente Marcos a limed ti nasao a katulagan iti nagbaetan ti administrasion ni Duterte ken ti China, agsipudta awan ti pagbasaran a katulagan ken nailimed daytoy kadagiti Pilipino.
Sigun pay kenni Marcos, amin a katulagan kadagiti sabali a “sovereign state” ket nasken kuma nga ipakaamo kadagiti Pilipino ken rumbeng a maamuan ti amin a Pilipino ti maipapan iti nasao a secret agreement ken no ania a teritorio ti inkompromisona ken intedna iti pagilian a China.
Maipalagip nga immuna nga inaklon ni Duterte nga adda ti katulaganda kenni Chinese President Xi Jingping a maaddaan iti status quo iti West Philippine Sea wenno ti saan a pannakaitulod dagiti construction materials para iti pannakatarimaan ti BRP Sierra Madre iti Ayungin Shoal.
