BAGUIO CITY – Manarimaan ti panangisagana ti Baguio City Police Office (BCPO) iti security plan para iti graduation rites ti Philippine Military Academy inton Dominggo.
Sigun kenni PSSupt. Ramil Saculles, Acting City Director ti BCPO, nainget ti panagbantay nga isayangkatda nangruna ta sumangbay manen ditoy siudad ni Presidente Rodrigo Duterte nga agserbi a kangrunaan a sangaili ti nasao nga aktibidad.
Kinunana a 12 hours latta ti duty dagiti pulis ken agkiddawda pay iti kanayunan a puwersa manipud iti Police Regional Office – Cordillera tapnu maipanamnama ti linak ken kapia ditoy lokalidad.
Kabayatanna, impanakkelna ti panagballigi ti insaganada a security plan para iti panakarambak ti napalabas a Panagbenga.
Innayonna a nagballigi ti deployment plan dagitoy gapu metlaeng ti kooperasyon dagiti umili ditoy siudad.
