Adadda a napaingetan ti security measures babaen ti abiso nga inpaulog ti senado kagiddan iti naituding a deadline iti panangipila ni Vice Presdient Sara Duterte ii sungbatna iti Articles of Impeachment daytoy.
Sigun iti nasao nga abiso- agingga alas-syete laeng inton bigat, Hunyo 1 ti deadline ti panangisumitir ti bise presidente iti sungbatna- personal man, babaen iti abogadona, wenno babaen iti electronic mail.
Maipalagip a pormal nga naipatulod ti summons keni VP Sara Duterte idi Mayo 20, dua nga aldaw kalpasan nga ag-convene ti senado kas impeachment court.
Manamnama met marugian ti impeachment trial inton Hulyo 6 no sadino sumango ni VP Sara iti reklamo a pananglabsing iti konstitusyon, graft and corruption, ken betrayal of public trust.
Mainaig iti dayta..
Gapu ta manamnama iti adu a media, supporters, ken kritiko ni VP Sara, nangipaulog ti Office of the Senate Secretary iti pagalagadan para iti coverage ti media ken nangituding dagitoy kadagiti lugar a pakaangayan ti press briefing iti kampo ti bise presidente.
Sigun iti senado, panggep ti nasao nga addang a masigurado ti natalged, naurnos, ken episyente a proseso ti panangipila iti sungbat ti bise presidente.
Mannarimaan ti pannakikoordinar ti National Capital Region Police Office (NCRPO) iti Office of the Sergeant-at-Arms tapno masalakniban ti seguridad iti aglawlaw ti senate premises. //bombokaren.c.sapirao
